به گوێره‌ی زانییارییه‌كانی گه‌یشتوو به ناوه‌ندی هه‌واڵنێریی سه‌قز، حه‌وتووی رابردوو پیرێژنێكی ته‌مه‌ن ٧٨ ساڵه‌ی ناوچه‌ی سه‌قز به ناوی خاتوو فاتم، له لایه‌ن ته‌نها كوڕه‌كه‌یه‌وه به‌ره‌و شاری ورمێ ده‌بردرێ و له‌وێ به تاقی ته‌نها به‌ڕه‌ڵڵا ئه‌كرێت.



ئه‌گوترێ كه ئه‌م پیرێژنه ماوه‌یه‌كی دوورودرێژه كه مێرده‌كه‌ی كۆچی كردوه‌ و له ماڵی تاقه‌ كوڕه‌كه‌ی ژیانی به‌سه‌ر بردوه‌، به‌ڵام به‌رده‌وام له لایه‌ن بووكه‌كه‌یه‌وه شه‌ڕ و گێچه‌ڵی پێ فرۆشراوه و ته‌نانه‌ت زۆر جار له پێش چاوی خه‌ڵكی گه‌ڕك و هاوسێ و جیرانه‌كانیان لێی دراوه‌ و سووكایه‌تی پێ كراوه‌.

هه‌نووكه خاتوو فاتمی ٧٨ ساڵه له شاری ورمێ به بێ هیچ سه‌رپه‌نایه‌ك شه‌وانه له ترمیناڵی ئه‌م شاره‌ ده‌خه‌وێت و به رۆژیشدا خه‌ریكی سواڵ و سه‌ده‌قه‌یه و به‌م شێوازه دوایین رۆژه‌كانی ته‌مه‌نی پڕ مه‌ینه‌تی خۆی تێپه‌ڕ ئه‌كات، ئه‌مه له حاڵێكدایه كه زۆربه‌ی هاوته‌مه‌نه‌كانی ئه‌و ئێستا له لایه‌ن منداڵه‌كانیانه‌وه‌ له ژێر چاوه‌دێریی و خزمه‌تگوزاری تایبه‌تدان و رێز له شه‌ونخونییه‌كانی سه‌ر پێشكه‌كانیان ده‌گیردرێت.